Tashmë nuk ka më kthim pas! Roger Federer luajti mbrëmjen e së premtes ndeshjen e fundit zyrtare në tenis, duke i dhënë lamtumirën sportit që i dhuroi aq shumë e që e shndërroi në një ikonë në mbarë botën.
Sfida e fundit për zvicerianin ishte tejet speciale pasi bëhej fjalë për një ndeshje dyshe dhe ai bashkëpunoi me rivalin dhe një nga miqtë e tij më të mirë, Rafael Nadal. Në fakt, dyshja europiane e turneut Laver Cup, e humbi sfidën me shifrat 2-1 ndaj dyshes amerikane, Jack Sock dhe Frances Tiafoe.
Megjithatë, disfata e fundit në karrierë, nuk kishte kurrsesi shans të prishte atmosferën e krijuar në Londër, aty ku i gjithë publiku përshëndeti Federer, e po njëjtë bënë edhe kolegët e tij ku spikasnin Tsitsipas, Djokovic, Berretini, Casper Ruud apo edhe Murray.
Sigurisht mes emocioneve të mëdha teksa organizatorët u kujdesën edhe për të kujtuar momentet më speciale të Federer gjatë karrierës së tij, 41-vjeçari nuk mundi të mbante lotët, ashtu si edhe Nadal që u prek tejmase nga lamtumira e mikut të tij.
E sigurt është se tashmë tenisi pa Roger Federer nuk është më i njëjti, me zvicerianin që konsiderohet si një nga më të mirët e këtij sporti me 20 tituj Grand Slam, teksa përveç titujve, 41-vjeçari është dalluar teknikën e lartë si dhe klasin që e shoqëronte gjithnjë në fushë, por edhe jashtë saj.
Top Channel
- “OKB, joefektive në përfundimin e luftërave”, Trump: Bordi i Paqes mund të zëvendësojë Kombet e Bashkuara - 20/01/2026
- Arsenal vazhdon të jetë perfekt, i imponohet dhe Interit në Champions League - 20/01/2026
- Gjykata shqyrtoi sot kërkesën për rritjen e pagave të gjyqtarëve, Rama kritika Kushtetueses: Skandal, marrin kompetencat e parlamentit - 20/01/2026