Trupi i të pandehurit të dënuar për gjenocid dhe krime lufte, “Kasapit të Bosnjës” Ratko Mlladiç, u transportua në Beograd me një aeroplan të qeverisë serbe.
Në fluturimin nga Haga, trupi i Mlladiçit shoqërohej nga djali i tij Darko, mbesa e tij Anastasia dhe Ministri serb i Drejtësisë Nenad Vuiç.
Në disa pika të autostradës ku kalonte automjeti që mbante trupin e Mlladiçit, qytetarët varën pankarta të mëdha me shkrimin:
“Ratko Mlladiç, hero serb”. Sipas mediave pro-qeveritare, funerali do të zhvillohet të hënën e ardhshme, më 7 shtator.
Shërbimi mortor do të mbahet në Kishën e Shën Lukës në lagjen Vidikovac të Beogradit, ku jeton familja e Mlladiçit. Nga e hëna në mëngjes deri në orën 12:00, qytetarët do të jenë në gjendje të bëjnë nderimet e fundit në Kishën e Shën Lukës.
Varrimi i tij do të bëhet në varrezat lokale ku është varrosur edhe vajza e Mlladiçit, e cila kreu vetëvrasje në vitin 1994.
Mlladiç vdiq më 27 gusht në spitalin e burgut të Tribunalit të Hagës ku po trajtohej.
Tribunali Ndërkombëtar Penal për ish-Jugosllavinë (ICTY) e dënoi Mlladiçin me burgim të përjetshëm më 8 qershor 2021.
Ai u shpall fajtor për gjenocid të kryer kundër afërsisht 8,000 myslimanëve boshnjakë në Srebrenicë, një zonë e mbrojtur nga OKB-ja, në verën e vitit 1995 kur ushtria serbe e Bosnjës filloi ofensivën e saj.
Ai u dënua gjithashtu për persekutim dhe zhvendosje me forcë të boshnjakëve dhe kroatëve në të gjithë Bosnjën dhe Hercegovinën, terrorizim të civilëve gjatë rrethimit të Sarajevës dhe marrjen peng të paqeruajtësve të OKB-së gjatë bombardimeve të NATO-s në vitin 1995.
- Protestuesit që vetëndihen në pushtet mbi Edi Ramën - 03/09/2026
- “Qeveria s’ka lidhje me çaktivizimin e rrjeteve sociale”- Rama: Turp grupit që përhap absurditete, duan t’i japin jetë revolucionit të shfryrë! - 03/09/2026
- Zelensky: Negociatorët amerikanë së shpejti në Kiev dhe Moskë, presim takim shumë të rëndësishëm! - 03/09/2026