Reshjet e shiut e të dëborës të rëna gjatë orëve të fundit, shoqëruar me erëra të forta kanë përkeqësuar situatën e furnizimit me energji elektrike në juglindje të vendit.
Pa energji elektrike prej dy ditësh vazhdojnë të jenë 9 fshatrat e bashkisë së Pustecit. Gjithashtu pa energji elektrike janë edhe fshatra të bashkisë së Pogradecit, Devollit, Kolonjës, Korçës, e Maliqit.
Mungesë të energjisë ka jo vetëm në fshatra të zonave malore të këtyre bashkive, por probleme ka edhe në fshatra të fushës së Devollit, e Maliqit ku pjesa më e madhe e tyre kanë pasur ndërprerje të shumta e të herëpashershme të energjisë elektrike.
E gjithë kjo situatë ka ardhur duke u rënduar për shkak të erërave të forta dhe reshjeve të dëborës të rëna orët e fundit. Defektet më të shumta janë në linjat e tensionit të ulët e të mesëm.
Grupe të shumta pune të OSHEE-së prej tre ditësh janë duke punuar në terren për rikthimin e energjisë elektrike në zonat me probleme.
Por ditën e sotme edhe për shkak të reshjeve të shumta të dëborës në zonat malore e ka bërë punën e tyre tejet të vështirë.
