Në ditën e zisë kombëtare, në respekt të jetëve të humbura në Turqi e Siri nga tërmeti i një jave më parë, pedagogë, studentë dhe stafi i Prefekturës kanë ndezur qirinj në ambientet e Rektoratit të Universitetit “Fan Stiljan Noli”.
Për prefektin Nertil Jole, ky homazh vjen në shenjë lutjeje për viktimat e tragjedisë së madhe të tërmetit në kufirin turko-sirian, si edhe në shenjë solidariteti me Turqinë mike.
Stafi i Universitetit dhe ai i Prefekturës Korçë, shoqëruar edhe nga studentë janë solidarizuar me homazhet e mbajtura në gjithe vendin, duke ndezur qirinj në respekt të jetëve të humbura në këtë katastrofë natyrore.
Po ashtu pasditen e djeshme, qindra qytetarë kanë kryer homazhe në zonën këmbësore të qytetit të Korçës, përpara bashkisë në nderim të viktimave të tërmetit rënë pak ditë më parë në Turqi dhe Siri.
Pjesë e homazheve kanë qënë edhe tre klerikët e myftinisë, mitropolisë dhe kishës katolike të Korçës të cilët kanë shprehur dhimbjen e tyre për viktimat e kësaj fatkeqësie natyrore. Të tre klerikët kanë dhënë mesazhin se në momente të tilla duhet të jemi të gjithë bashkë.
Homazheve u janë bashkuar edhe përfaqësues dhe punonjës të institucioneve të ndryshme lokale, të cilët kanë vendosur lule dhe kanë ndezuar qirinj tek shkallët e bashkisë për jetët e humbura nga tërmeti tragjik në Turqi e Siri.
