Nga Mero Baze
Qeveria po kryqëzon Sali Berishën pse ai ka njoftuar se do të organizojë një protestë më 6 dhjetor, kur në Tiranë do të jenë udhëheqësit kryesorë të Bashkimit Evropian. Po i vënë gjithë epitetet e mundshme, si antishqiptar dhe destabilizues dhe po përpiqen ta kompleksojnë atë me shpresë se e kanë kapur ngushtë.
Madje këtyre zërave iu janë bashkuar dhe deputetë të PD, që nuk janë në grupin e Sali Berishës.
Argumenti i tyre kryesor se protesta turpëron Shqipërinë në sytë e Bashkimit Evropian, në fakt nuk është e vërtetë. Protesta e shpëton Shqipërinë në sytë e udhëheqësve të Bashkimit Evropian.
Ata po vijnë në një vend demokratik, dhe jo në një vend të kontrolluar nga Qeveria dhe pushteti.
Ata po vijnë në një vend ku ka opozitë të pushtetit, por dhe opozitë të orientimit perëndimor të Shqipërisë. Kjo nuk mund të fshihet.
Sali Berisha është person “non grata” nga SHBA, Britania e Madhe dhe thuajse i izoluar nga çdo vend i Bashkimit Evropian.