Ministri i Jashtëm rus Sergei Lavrov tha se Moska nuk do të hyjë në negociata me Ukrainën për t’i dhënë fund luftës, edhe pasi ka hasur një sërë pengesash në fushën e betejës.
Kremlini nuk do të diskutojë kërkesat e Ukrainës që ajo të tërhiqet nga tokat e pushtuara dhe të paguajë dëmshpërblime, tha Lavrov në një intervistë me shërbimin shtetëror të lajmeve RIA Novosti të botuar të enjten. Ai në fillim të kësaj jave tha se Ukraina duhet të heqë dorë nga sovraniteti mbi territoret e aneksuara nga Rusia që kur Presidenti Vladimir Putin urdhëroi pushtimin e 24 shkurtit.
Kombet e Bashkuara kanë dënuar “përpjekjet për aneksimin e paligjshëm” nga ana e Rusisë, të katër rajoneve pjesërisht të pushtuara të Ukrainës lindore dhe jugore, pasi Putini nënshkroi urdhrat në shtator për përvetësimin e tyre në vendin e tij.
Forcat ukrainase po rimarrin në mënyrë të qëndrueshme territoret ndërsa i shtyjnë trupat ruse me ndihmën e miliarda dollarëve të armëve amerikane dhe evropiane. Megjithatë, ka sinjale se lufta mund të zgjasë edhe vitin e ardhshëm, pasi Rusia kohët e fundit mobilizoi rreth 300,000 rezervistë.
Ministri i Jashtëm ukrainas Dmytro Kuleba tha në një intervistë me Associated Press të hënën se vendi i tij dëshiron të mbajë një samit paqeje në shkurt, por ai nuk parashikon që Rusia të marrë pjesë. Kievi është gati të mbajë bisedime të drejtpërdrejta me Moskën vetëm pasi Rusia të përballet me një gjykatë për krimet e luftës, tha ai.
Lavrov tha në intervistën e tij se Rusia nuk do t’i nënshtrohet asnjë gjykate.
Rusia të enjten lëshoi një breshëri tjetër në shkallë të gjerë sulmesh raketore në të gjithë Ukrainën, duke vazhduar fushatën e saj të bombardimit të energjisë dhe infrastrukturës në një përpjekje deri tani të pasuksesshme për të shtypur shpirtin luftarak të ukrainasve.
Me luftën në muajin e saj të 11-të, Putin pranoi javën e kaluar se forcat ruse përballen me një situatë “jashtëzakonisht të vështirë” në katër rajonet e pushtuara. Në nëntor, Rusia u detyrua të tërhiqej nga qyteti jugor Kherson, i vetmi kryeqytet rajonal që kishte pushtuar gjatë luftës.
Megjithatë, ai u tha zyrtarëve të lartë ushtarakë se Rusia “nuk ka kufizime” në shpenzimet ushtarake për luftën.
