Më 6 dhjetor, Partia Demokratike do ta organizojë protestën e thirrur në bulevardin “Dëshmorët e Kombit”, aty ku organizohet zakonisht.
Në një intervistë për gazetën “Panorama”, sekretari i Përgjithshëm i Partisë Demokratike, Flamur Noka, deklaroi se vendi i protestës nuk do të ndryshojë pavarësisht se Policia ka deklaruar se nuk do lejohet në atë zonë për shkak të perimetrit të sigurisë pasi në të njëjtën ditë zhvillohet edhe Samiti i BE me vendet e Ballkanit Perëndimor. Por sipas Nokës, protesta do të jetë tubimi më qytetar i parë ndonjëherë në historinë e Shqipërisë.
Në intervistën e mëposhtme, Noka thotë se protesta nuk është për PD-në, dhe problemet e saj të brendshme, por për problemet që lidhen me demokracinë dhe rrezikun që i kanoset sipas tij, vendit nga Kryeministri Rama. Kërkesa e vetme në atë protestë sipas tij, do jetë ndaj liderëve të vendeve të BE që të mos mbështesin Kryeministrin Rama pasi po vret demokracinë në vend dhe sipas tij, po instalon një sistem të ri monizmi. Një mesazh Noka e pati edhe për kolegët e tij të djathtë kur u bëri thirrje që të mos gëlltisin “çorbën” e qeverisë sa i përket propagandës kundër protestës.
Z. Noka, Policia e Shtetit në komunikatën që ju ka sjellë juve ka deklaruar se nuk do lejohet protesta në bulevardin “Dëshmorët e Kombit” për shkak të sigurisë së disa prej drejtuesve të vendeve kryesore të BEsë dhe Ballkanit. A do ta ndryshoni vendin?
Jo, protesta do të zhvillohet aty ku organizohen gjithmonë. Miqtë nga Bashkimi Evropian do trajtohen si mysafirë.
Pse zgjodhët pikërisht datën 6 dhjetor për të protestuar. Pse nuk e lato në një ditë tjetër, dy ditë më vonë është edhe dita e rinisë?
Data 6 dhjetor, ka një domethënie të madhe për shqiptarët. Në Shqipëri për herë të parë zhvillohet një samit ndërkombëtar. Liderët evropianë zbarkojnë në Shqipëri. Kjo është një datë e rëndësishme. Sigurisht që në kushtet ku ndodhet Shqipëria ku po instalohet monizmi, ku papunësia, varfëria, janë ulur këmbëkryq në çdo sofër shqiptari, në kushtet kur vjedhja është bërë moto e qeverisjes së këtij vendi, në kushtet kur babëzia, qeveria përvëlon mbi gjithçka në këtë shtet, në kushtet kur shpopullimi është alarm dhe Shqipëria po kthehet në një tokë të shkretë.
Shqiptarët e lirë që jetojnë brenda këtij vendi kanë arsye dhe motiv për të protestuar. Për të mirëpritur liderët evropianë dhe në radhë të dytë, për t’u thënë që nuk ka demokraci. Në Shqipëri pluralizmi po vdes, në Shqipëri njeriu që përpiqet t’ju thotë ju mrekulli ka instaluar monizmin. Që në Shqipëri, shqiptarët ndihen më keq se nën pushtim nën regjimin e këtij Kryeministri.
Si do t’ia dëshmoni të gjitha këto që sapo thatë? Mbase ata as nuk do të kenë mundësi që t’ju shohin.
Ne nuk do protestojmë para tyre. Do protestojmë aty ku protestojmë gjithmonë. Një protestë e kulturuar, paqësore dhe qytetare. Siç dimë dhe kemi bërë ne protestat. E keni parë 7 korrikun dhe 12 nëntorin. Janë dy protestat më të mëdha në historinë e demokracisë. Janë edhe dy protestat më paqësore që ka pasur ky vend. Ne thjesht mblidhemi për t’u thënë liderëve evropianë se nuk mund të takoni dhe të mbështesni kreun e një regjimi, pasi ai nuk është demokratik.
Nuk mund t’i jepni suport një njeriu që u ka vënë bashkë me bandën e tij shkelmin në fyt shqiptarëve. Shqiptarët nuk kanë një Kryeministër, por kanë një sulltan. Nuk kanë një qeveri, por kanë një oborr. Këtë do u themi ndërkombëtarëve. Që Shqipëria është në këtë pikë. Do u themi që ne kemi detyrë që të luftojmë për të mbrojtur demokracinë dhe pluralizmin. Kemi detyrë të luftojmë për shqiptarët. Motiv më të madh se shqiptarët nuk ka askush për të protestuar. Motiv më të madh për të reaguar nuk ka kush tjetër shqiptarëve. Ne kemi për detyrë që t’i prijmë shqiptarët. Kjo është një betejë me armikun më të egër që ka pasur Shqipëria të ulur në atë karrige.
Z. Noka, ju si organizator, do mbani përgjegjësi që mos të ketë shfaqje të dhunshme, në një kohë që do ketë një vëmendje të veçantë nga mediat jo vetëm shqiptare?
Të gjitha këto lajme kanë një kuzhinë. Kanë kuzhinën e qeverisë.