Shkenca i jep fund goditjeve në tru, me ardhjen e “mili-spinner”, një pajisje të re nga Stanfordi
Një zbulim premtues nga studiuesit e Universitetit të Stanfordit mund të shënojë një kthesë historike në trajtimin e goditjes në tru. Një pajisje e re, e quajtur “mili-spinner”, po cilësohet si një nga risitë më të fuqishme në mjekësinë moderne, me potencial për të shpëtuar mijëra jetë në mbarë botën.
Pajisja është krijuar për të hequr mpiksjet e gjakut në tru me një saktësi dhe efikasitet të paprecedentë. Ndryshe nga teknologjitë tradicionale të trombektomisë, të cilat mund të jenë të pamjaftueshme për mpiksjet e mëdha dhe shpesh lënë fragmente të rrezikshme që mund të shkaktojnë goditje të mëtejshme, “mili-spinner” përdor një tub rrotullues të pajisur me “pendë” që i kompreson, fragmenton dhe thith me kujdes mpiksjet, duke minimizuar rrezikun dhe maksimizuar suksesin.
Rezultatet e hershme janë marramendëse. Në 90% të rasteve, pajisja arrin të largojë mpiksjet më të forta që në përpjekjen e parë, një përmirësim dramatik krahasuar me vetëm 11% që arrihet me teknologjinë ekzistuese. Kjo rritje e ndjeshme në efektivitet jo vetëm që përmirëson shanset për mbijetesë, por edhe redukton ndjeshëm pasojat afatgjata të dëmtimit cerebral.
Ekspertët e mjekësisë po e cilësojnë këtë si një “ndryshim paradigme” në luftën kundër goditjes në tru, një ndër shkaktarët kryesorë të vdekshmërisë dhe paaftësisë në botë. Por potenciali i saj nuk ndalet këtu. Teknologjia e mili-spinner mund të aplikohet edhe në pjesë të tjera të trupit, ku mpiksjet apo bllokimet përbëjnë rrezik jetik, si në mushkëri, zemër apo arterie periferike.
Ndërsa kërkimet dhe testimet klinike vazhdojnë, studiuesit në Stanford shpresojnë ta çojnë këtë pajisje drejt përdorimit të gjerë në spitale. Në horizont po shfaqet një epokë e re, ku fjala “goditje në tru” nuk do të nënkuptojë më frikë, por një sfidë që mund të kapërcehet me sukses.
Përgatiti: Albert Vataj
