Mbi 29.000 njerëz kanë humbur jetën, në përpjekje për të emigruar drejt Evropës, që prej vitit 2014.
Ky është përfundimi i Organizatës Ndërkombëtare për Migrantët në raportin e publikuar së fundmi. Në këtë raport, theksohet, se mbi 5.000 viktima janë regjistruar vetëm në dy vitet e fundit.
Më tej thuhet se rruga më vdekjeprurëse vazhdon të jetë qendra e Mesdhetut, ku 2.836 migrantë dhe refugjatë kanë vdekur prej janarit të vitit 2021, teksa kanë tentuar të arrijnë në Itali apo Maltë nga Libia dhe Tunizia.
Sipas raportit, rritje e numrit të viktimave është vërejtur edhe në kufijtë evropianë, duke përmendur Greqinë, Ballkanin Perëndimor dhe Kanalin Anglez.
Për herë të parë, në raport janë përmendur edhe vdekjet e lidhura me dëbimet e migrantëve nga autoritetet evropiane. Sipas raportit, që është bazuar në raportimet e dëshmitarëve, 252 persona kanë vdekur si pasojë e dëbimeve.
Kthimi mbrapsht i migrantëve është vepër e paligjshme sipas ligjit ndërkombëtar dhe atij të Bashkimit Evropian, sepse në atë rast shkelet e drejta e një njeriu për të kërkuar azil.