Pavarësisht reshjeve të dëborës situata në qarkun e Korçës paraqitet normale sa i përket qarkullimit në akset nacionale dhe në ato turistike të Dardhës e Voskopojës.
Një gjë e tillë është bërë me dije nga Oltion Zhamo përgjegjës i autoritetit rrugor shqiptar sektori Korçë. Sipas tij në qarkun e Korçës gjatë natës ka pasur reshje dëbore e ndërsa në disa zona ka qënë të shoqëruara edhe me erë.
Trashësia e borës varion nga 5 cm në pjesën e fushës së Korçës e deri në 20 cm në zonat e thella malore.
Aktualisht reshjet e borës janë sporadike me ndërprerje dhe lokale.
Firmat kontraktore janë në gadishmëri për mirëmbajtjen e akseve turistike por edhe ato malore pasi pritet që reshjet të vijojnë gjatë gjithë ditës dhe parashikohen uljet e temperaturave gjatë natës.
Në aksin Korçë-Voskopojë janë 2 borëpastruese në dispozicion, Në Korçë-Boboshticë-Dardhë janë 3 borëpastruese, në aksin Korçë-Qafë e Qarrit-Ersekë janë 4 borëpastruese e në aksin Leskovik-Çarshovë është një borëpastruese në dispozicion për mirëmbajtjen e këtij aksi.
Probleme ka patur në orët e para të paradites në rrugët e fshatrave të njësive administrative Lekas, Voskopojë e Vithkuq, si dhe në fshatra të Devollit të sipërm.
Por, falë ndërhyrjeve të ndërmarrjeve të shërbimeve, gjithçka është e normalizuar.
Zyrtarisht, nga filiali i OSHEE së qarkut të Korçës, është bërë me dije se pas reshjeve të borës rënë gjatë natës e mëngjesit të sotëm, nuk ka patur ndërprerje të energjisë elektrike.
