Ekonomia e Eurozonës u rrit më shumë se parashikimet gjatë tremujorit të dytë të vitit 2026, pavarësisht goditjes energjetike të shkaktuar nga lufta në Lindjen e Mesme.
Sipas të dhënave paraprake të Eurostat, Prodhimi i Brendshëm Bruto i 21 vendeve të monedhës së përbashkët u rrit me 0.4% në periudhën prill-qershor. Në tremujorin e parë, ekonomia e Eurozonës nuk kishte shënuar rritje.
Rezultati ishte dy herë më i lartë se parashikimi prej 0.2% i ekonomistëve të anketuar nga Bloomberg.
Rritja u mbështet nga performanca pozitive e ekonomive më të mëdha të bllokut. Gjermania dhe Franca u zgjeruan me nga 0.2%, ndërsa Spanja shënoi një rritje prej 0.7%, e nxitur edhe nga ecuria e fortë e sektorit të turizmit. Edhe ekonomia italiane u rrit me 0.2%.
Kontribut të rëndësishëm në rezultatin e përgjithshëm dha edhe Irlanda, ekonomia e së cilës u zgjerua me 3.9%, pas tkurrjes së fortë të regjistruar në tremujorin e parë.
Të dhënat tregojnë se Eurozona ka përballuar më mirë nga sa pritej rritjen e çmimeve të energjisë dhe pasiguritë e shkaktuara nga konflikti në Lindjen e Mesme.
Çmimi i naftës Brent është rikthyer mbi 92 dollarë për fuçi, pas prishjes së armëpushimit.
Banka Qendrore Evropiane ka mbajtur të pandryshuara normat bazë të interesit në 2.25%, ndërsa vijon të vlerësojë ndikimin e luftës mbi inflacionin dhe rritjen ekonomike.
Sipas parashikimeve të BQE-së, ekonomia e Eurozonës pritet të rritet me 0.8% gjatë vitit 2026 dhe me 1.2% në vitin 2027.
Megjithatë, perspektiva mbetet e pasigurt për shkak të çmimeve të energjisë, inflacionit që vijon të mbetet mbi objektivin prej 2% dhe zhvillimeve të mëtejshme në Lindjen e Mesme.
- U arrestua në Greqi me urdhër të SPAK, Ilir Shtufi vijon refuzimin e ekstradimit në Shqipëri, Gjykata e Selanikut merr vendimin për biznesmenin - 30/07/2026
- Ekonomia e Eurozonës rritet mbi pritshmëritë, i reziston krizës energjetike dhe tensioneve në Lindjen e Mesme - 30/07/2026
- “Shqipëria, në udhëkryqin e fundit”/ Rama përpara socialistëve: Dera e BE-së nuk rri e hapur në pafundësi, kjo s’është beteja e PS për të mbetur në pushtet - 30/07/2026