Në një kohë kur zhvillimet demografike dhe politike në Luginën e Preshevës po ngjallin shqetësim të thellë në mbarë opinionin publik shqiptar, një thirrje e fuqishme alarmi u artikulua sot në Tiranë, gjatë promovimit të librit me poezi “Zëri im për ty Medvegjë” të poetes Majlinda Shaqiri. Poezitë e autores, që pasqyrojnë dhimbjen, shpërnguljen dhe braktisjen e detyruar të shqiptarëve nga vendlindja e tyre, u bënë nxitje për një diskutim të gjerë mbi gjendjen e komunitetit autokton shqiptar në tre komunat e Luginës.
Në aktivitet morën pjesë personalitete publike, përfaqësues të mbi 10 shoqatave kulturore dhe atdhetare—mes tyre Tirana, Dibra, Mallakastra, Labëria etj.—si dhe Presidenti i nderit Alfred Moisiu. Një rol të veçantë pati edhe Kryetari i Asamblesë , z. Shkëlqim Hajdari dhe Ruzhdi Keçi, Kryetari i Shoqatës “Tirana” të cilët me angazhimin e tyre të vazhdueshëm në çështjet kombëtare dhe kontributin organizativ, ndihmuan në strukturimin e debatit dhe në përforcimin e mesazhit shoqëror që u artikulua sot. Z. Hajdari theksoi domosdoshmërinë e sensibilizimit institucional dhe shoqëror, duke e cilësuar situatën në Luginë si një sfidë që kërkon vëmendje të menjëhershme.
Në përfundim të diskutimeve, pjesëmarrësit—në unanimitet—ranë dakord që të përgatitet një deklaratë proteste publike, e cila do të denoncojë boshatisjen e qëllimshme, presionet administrative dhe shkeljet e të drejtave të shqiptarëve në Preshevë, Bujanoc dhe Medvegjë. Kjo deklaratë do të synojë t’i bëjë thirrje institucioneve brenda dhe jashtë vendit për të ndërhyrë dhe për të vënë në fokus një çështje që po merr përmasa alarmante.
Dokumenti, pasi të nënshkruhet nga organizatorët e aktivitetit, drejtues shoqatash, personalitete kulturore e akademike brenda dhe jashtë vendit, do t’u adresohet institucioneve kryesore kombëtare dhe ndërkombëtare, përfshirë:
• Qeverinë dhe Parlamentin e Shqipërisë
• Qeverinë dhe Kuvendin e Kosovës
• Ambasadat e vendeve anëtare të Bashkimit Europian në Shqipëri dhe Kosovë
• Ambasadën e Shteteve të Bashkuara të Amerikës
• Këshillin e Europës
• Parlamentin Europian
• Komisionin Europian
Qëllimi është ngritja e një reagimi zyrtar dhe institucional, i cili të mbrojë të drejtat dhe ekzistencën e komunitetit shqiptar në Luginën e Preshevës, duke e trajtuar situatën si një çështje themelore të të drejtave të njeriut dhe të barazisë qytetare.
Promovimi i librit dhe debati i zhvilluar sot treguan edhe një herë se arti, kultura dhe shoqëria civile mbeten zëra të fuqishëm në mbrojtjen e të drejtave të komunitetit shqiptar. Në një kohë kur shpërngulja po rrezikon strukturën demografike dhe identitetin e trevave shqiptare, thirrja “SOS për Luginën e Preshevës” merr një domethënie të veçantë dhe të ngutshme.
- Boshatisja dhe alarmi për shkeljet e të drejtave në Luginën e Preshevës: Një thirrje urgjente nga komuniteti intelektual dhe shoqëror shqiptar - 27/11/2025
- Manjani i përgjigjet Sonila Meços: “ibratorët e Benit” dhe “palloshi i Belës” nuk janë domosdoshmëri për… - 27/11/2025
- SPAK-u shitet në 21 Janar - 27/11/2025