Këngëtari i njohur Shpat Kasapi do të përcillet sot për në banesën e fundit, 30 nëntor 2025.
Njoftimi është dhënë nga familjarët, të cilët me dhimbje kanë bërë të ditura detajet e ceremonisë mortore.
Homazhet për artistin që u nda nga jeta më 26 nëntor, do të zhvillohen prej orës 12:00 në Pallatin e Kulturës në Tetovë, ndërsa ceremonia e varrimit do të mbahet në orën 14:00 në varrezat e qytetit.
Njoftimi i familjarëve:
Me pikëllim të thellë njoftojmë ndarjen nga jeta të birit, babait, bashkëshortit, vëllait dhe shokut tonë të dashur, SHPAT KASAPI
(1 maj 1985 – 26 nëntor 2025)
Shpati ishte një zemër e bardhë, një shpirt i gëzuar që jetonte me këngë në buzë dhe me dritë në sy. Ai falte vetëm dashuri e mirësi, dhe kush e njohu, e ndjeu ngrohtësinë e tij.
Ikja e tij e papritur ka thyer zemrat tona. Do të na mungojë zëri i butë, buzëqeshja e tij e sinqertë dhe prania që na jepte qetësi. Kujtimi i tij do të mbetet i paharrueshëm për ne.
Të gjithë ata që dëshirojnë t’i japin lamtumirën e fundit Shpatit tonë të dashur janë të mirëpritur të marrin pjesë në ceremoninë e tij.
Homazhet do të mbahen të dielën, 30.11.2025, në orën 12:00, në Pallatin e Kulturës në Tetovë. Varrimi: në orën 14:00, në varrezat e qytetit të Tetovës. Qoftë i përjetshëm kujtimi i tij! U prehtë në paqe!
Shpat Kasapi u nda nga jeta në moshën 40 vjeçare pas një ataku kardiak gjatë qëndrimit të tij në Itali, ku ndodhej për një koncert.
Lajmi, tronditi jo vetëm familjarët dhe miqtë e tij, por edhe mbarë publikun dhe komunitetin artistik në të gjitha trevat shqiptare. Ai la pas një djalë 3 vjeç, Roelin dhe partneren e tij, Selvijen.
Shpat Kasapi, një prej emrave më të dashur të muzikës zbavitëse, la pas një karrierë të gjatë me projekte të suksesshme dhe hite që u kënduan nga disa breza. “Valle Kosovare”, një ndër këngët e tij më të njohura, ka qenë prej vitesh pjesë e pandashme e festave dhe dasmave shqiptare
