Skënderbeu pasi ka fituar ndeshjen e parë në tranfertë 0-3 me Partizanin, takim i vlefshëm për Ligën “Gjergj Kastrioti” në volejboll për femra, këtë të shtunë luan ndeshjen e dytë gjysmëfinale të kësaj lige.
Takim ky që pritet me mjaft interes edhe për faktin se korçaret e rrjetës këtë sezon kërkojnë jo vetëm kupën e ligës edhe trofetë e tjera të këtij viti.
Për trajnerin Orlando Koja, skuadra e Partizanit duhet vlerësuar, pavarësisht ndeshjes së fituar vetëm pak ditë më parë në kryeqytet.
Deri tani është shprehur Koja, me Partizanin kemi luajtur vetëm në transfertë dhe kjo përballje është e para në shtëpi për këtë sezon. Ndaj dhe për këtë kryepankina e rrjetës korçare kërkon mbështetjen e tifozerisë.
Edhe për drejtoren e Klubit Shumësportësh Skënderbeu Olsa Vaso, takimi i dytë me Partizanin është i rëndësishëm pasi përcakton finalisten e Ligës “Gjergj Kastrioti”. Ashtu si trajneri Koja, edhe titullarja e klubit kërkon mbështetjen e tifozëve korçarë.
Për ndeshjen e dytë përballë Partizanit, Skënderbeu e fillon lojën me të gjitha lojtaret titullare, ndërkohë që të gatshme janë edhe lojtaret e stolit.
Takimi Skënderbeu-Partizani, luhet ditën e shtunë në pallatin e sportit “Tamara Nikolla” në orën 17:00, ndeshje kjo që përcakton finalisten e Ligës “Gjergj Kastrioti”.
