Derbi i shumëpritur mes Everton dhe Liverpool nuk u zhvillua siç ishte planifikuar fundjavën e kaluar, pasi u shty për shkak të një alarmi për mot të keq. Ndeshja, që mund të zhvillohet në muajin shkurt, ishte një moment që një tifoze e flaktë e Everton nga Australia e kishte ëndërruar prej kohësh. Por, pasi kishte fluturuar 17 mijë kilometra deri në Liverpool, ajo u përball me një zhgënjim të madh. Megjithatë, kapiteni i Everton, Seamus Coleman, e surprizoi tifozen me një mesazh dhe një ftesë për të ndjekur stërvitjen e ekipit.
Një tifoze 15-vjeçare fluturon nga Sydney në Liverpool për derbin
Pasioni për futbollin nuk njeh kufij. Mackenzie Kinsella, një 15-vjeçare nga Sydney, është një fanse e madhe e Everton, një dashuri që ia ka transmetuar nëna e saj, Rita, e lindur në Liverpool. Për Mackenzie, derbi i Merseyside është një nga ndeshjet më të rëndësishme. Ajo kishte kursyer për muaj të tërë, duke mbledhur 1500 paund (rreth 1800 euro) për të blerë biletën e fluturimit dhe atë të ndeshjes, përfshirë edhe një tjetër ndeshje, atë ndaj Wolves (që Everton e fitoi 4-0). Të shtunën shpresonte të ishte dëshmitare e derbit legjendar në “Goodison Park”, por moti i keq i prishi planet.
Coleman e fton të ndjekë stërvitjen e Everton
Megjithëse ndeshja u shty, Mackenzie mori një surprizë të këndshme. Kapiteni i Everton, Seamus Coleman, i dërgoi një mesazh përmes një videoje që u bë menjëherë virale:
“Ç’kemi, Mackenzie, unë jam Seamus Coleman. Doja të të dërgoja një mesazh për të të thënë që e di sa e zhgënjyer je sot. Di sa shumë ke kursyer për të udhëtuar nga Australia për derbin e Merseyside. Di sa shumë mezi e prisje të jetoje eksperiencën e derbit të fundit në ‘Goodison Park’, ndaj jam i sigurt që sot je shumë e mërzitur. Të gjithë ne, tifozët e Everton, jemi po ashtu të zhgënjyer. Nuk shihnim momentin për ta luajtur këtë ndeshje.”
Për ta ngushëlluar, Coleman e ftoi Mackenzie-n në stërvitjen e ekipit: “Do të na pëlqente shumë të të shihnim këtu në fushën e stërvitjes të hënën, nëse je dakord. Shpresoj të takosh disa nga djemtë dhe që kjo të të ndihmojë pak të harrosh zhgënjimin. Do të kemi mundësi të flasim pak. Të uroj më të mirat, Mackenzie, dhe kujdesu për veten.”
Ky gjest i kapitenit të Everton është një shembull i shkëlqyer i asaj se si një skuadër mund të krijojë lidhje të veçanta me tifozët e saj, përtej fushës së lojës.
