“Rimodelim”, pra përshtatje me rrethanat e reja. Kjo është fjala që përdori dje kardinali Pietro Parolin për të shpjeguar nëse sëmundja dhe shtrimi në spital do të ndikojnë në mënyrën se si Papa Leoni do ta drejtojë Kishën Katolike në të ardhmen e afërt.
Pyetjes së gazetarëve, sekretari i Shtetit të Vatikanit iu përgjigj se ende nuk ka një përgjigje të qartë.
Gjithçka do të varet nga koha kur Papa do të dalë nga spitali, gjendja e tij shëndetësore dhe vlerësimi i mjekëve.
“Duhet të shohim se kur do të kthehet, në çfarë gjendjeje do të jetë dhe çfarë do të thonë mjekët. Në bazë të këtyre elementeve, Papa do ta përshtatë pontifikatin e tij, nëse do të jetë e nevojshme”, deklaroi Parolin.
Shembujt e Benediktit XVI dhe Françeskut
Ndërhyrja kirurgjikale për heqjen e një tumori malinj në mushkëri, e kryer të martën në spitalin Gemelli, e detyron Papën të kalojë një periudhë rikuperimi.
Deri më tani, Leoni është perceptuar nga publiku si një Papë relativisht i ri, 71 vjeç, dhe aktiv fizikisht.
Megjithatë, një problem serioz shëndetësor mund të ndikojë në ritmin dhe drejtimin e një pontifikati.
Historia e Vatikanit ka treguar se shëndeti i Papës mund të ndikojë në vendimet e tij. Benedikti XVI vendosi të hiqte dorë nga papati pasi kishte përjetuar probleme shëndetësore gjatë një udhëtimi në Meksikë dhe Kubë, ndërsa përgatitej për një tjetër udhëtim në Brazil, të cilin e kishte të vështirë ta realizonte.
Edhe Papa Françesku, gjatë një shtrimi të papritur në spital në vitin 2023, telefonoi kardinalin Víctor Manuel Fernández për t’i paraprirë emërimit të tij në krye të Dikasterit për Doktrinën e Besimit. Më pas, gjatë pontifikatit të tij, u ndërmorën disa reforma të rëndësishme, përfshirë lejimin e bekimit të çifteve të të njëjtit seks në kushte të caktuara dhe masa të reja lidhur me shfaqjet e pretenduara të Virgjëreshës Mari.
A do të përshpejtojë Papa Leoni reformat?
Për momentin, mbetet e paqartë nëse Leoni do të ndryshojë ritmin e drejtimit të Kishës. Përpara çdo vendimi, duhet të priten rezultatet e analizave të nyjeve limfatike, të cilat do të përcaktojnë nëse Papa ka nevojë për trajtime të tjera dhe se për çfarë trajtimesh bëhet fjalë.
Për këtë arsye, është ende herët të parashikohet nëse ai do të përshpejtojë ndryshimet në administratën e Kurisë Romake, ku gjatë 17 muajve të pontifikatit të tij ka vepruar me ritëm të ngadaltë.
Po ashtu, nuk dihet nëse do të thërrasë një konsistor për emërimin e kardinalëve të rinj, do të nisë përgatitjet për një enciklikë të re pas Magnifica Humanitas apo do të marrë vendime për çështje që vazhdojnë të shkaktojnë debate brenda Kishës, si mesha në latinisht, morali seksual dhe mundësia që gratë të marrin një rol zyrtar fetar në Kishën Katolike.
Një nga ndryshimet e mundshme lidhet me udhëtimin e planifikuar në Amerikën Latine në nëntor. Për shkak të gjendjes shëndetësore, agjenda mund të shkurtohet ose datat e vizitës të shtyhen.
Kardinalët: Nuk pritet të ndryshojë mënyrën e drejtimit
Përfaqësues të lartë të Kishës Katolike mendojnë se, nëse rikuperimi shkon mirë, Papa mund të vazhdojë ta drejtojë Kishën me të njëjtin stil të qetë dhe të matur.
Kardinali indian Felipe Neri Ferrao ka theksuar se mjekët ende nuk kanë vendosur se çfarë trajtimi do të ndjekë Papa. Sipas tij, fillimisht duhet pritur kthimi i tij dhe më pas të shihet se si do të zhvillohen gjërat.
Edhe kryepeshkopi Timothy Costelloe, president i Konferencës Ipeshkvnore të Australisë, nuk pret që Leoni të ngadalësojë ndjeshëm, por as të përshpejtojë shumë ritmin e punës.
Ai e përshkroi Papën si një njeri të qëndrueshëm, që i mendon dhe i ndërmerr hapat njëri pas tjetrit. Sipas tij, nëse rikuperohet mirë, pas periudhës fillestare të shërimit, Leoni ka gjasa t’i rikthehet mënyrës së mëparshme të punës.
Në të njëjtën linjë është edhe kardinali Paul S. Coakley, president i Konferencës së Ipeshkvijve Katolikë të Shteteve të Bashkuara. Ai vlerëson se qetësia dhe maturia janë pjesë e stilit të Papës prej shumë vitesh dhe nuk pritet të ndryshojnë brenda natës.
Nga ana tjetër, kardinali Jaime Spengler, president i Këshillit të Konferencave Ipeshkvnore të Amerikës Latine, thekson se Leoni ka ndërmarrë tashmë disa ndryshime të papritura, edhe pse në mënyrë diskrete. Sipas tij, perceptimi se Papa ka ecur ngadalë në fillim të pontifikatit nuk pasqyron domosdoshmërisht të gjitha zhvillimet.
Sëmundja mund t’i japë Papës më shumë besueshmëri
Kardinali Blase Cupich, kryepeshkop i Çikagos, ka shprehur shqetësimin e tij pas lajmit se tumori i Papës ishte malinj dhe se ishte e nevojshme të hiqej një pjesë e mushkërisë.
Në një intervistë për revistën America dhe gazetën La Nación, ai vuri në dukje se përballja me një sëmundje të rëndë mund të ndikojë edhe në mënyrën se si një person perceptohet nga të tjerët.
Sipas Cupich, njerëzit që kalojnë vështirësi shëndetësore dhe arrijnë t’i kapërcejnë ato shpesh bëhen më të afërt me të tjerët dhe fitojnë më shumë besueshmëri kur flasin për përvojat e tyre.
Ai shpreson që e njëjta gjë të ndodhë edhe me Papën Leonin, duke theksuar se prioriteti tani është shërimi i tij.
Për momentin, Vatikani pret rezultatet mjekësore dhe rikuperimin e Papës. Vetëm më pas do të bëhet më e qartë nëse sëmundja do të sjellë ndryshime në ritmin e pontifikatit apo nëse Leoni do të vazhdojë të ndjekë të njëjtën mënyrë drejtimi si deri më tani.
- Sëmundja e Papa Leonit ngre pikëpyetje në Vatikan, a do të ndryshojë drejtimi i Kishës Katolike? - 16/10/2026
- Drejtori i Policisë: Janë identifikuar kanale komunikimi që bëjnë thirrje për akte terroriste! Partnerët e huaj po na ndihmojnë t’i zbulojmë - 16/10/2026
- “Forcat e errëta po përdorin mercenarë e minorenë”- Protesta, Demo njofton pezullimin 2 efektivëve të Policisë: Ligji do të jetë i barabartë për të gjithë! Prindërit… - 16/10/2026