Raundi i fundit i bisedimeve të paqes mes Rusisë dhe Ukrainës, që u zhvillua të mërkurën në Gjenevë, me ndërmjetësimin e Shteteve të Bashkuara të Amerikës, përfundoi pa një përparim të madh, për t’i dhënë fund luftës, që javën tjetër hyn në vitin e saj të pestë.
Presidenti i Ukrainës, Volodymyr Zelenskyy, tha se në bisedimet në Zvicër nuk ishte arritur asnjë marrëveshje mbi çështjet e rëndësishme, ndërsa akuzoi Moskën se “po përpiqet ta zvarrisë” procesin.
“Ne mund të shohim se është bërë njëfarë pune themelore, por qëndrimet vijojnë të jenë të ndryshme, sepse negociatat nuk ishin të lehta”, u shpreh ai.
Zelenskyy tha se statusi i territoreve të pushtuara nga Rusia në Ukrainën lindore dhe e ardhmja e termocentralit bërthamor Zaporizhzhia, i cili mbetet nën kontrollin e Moskës, ishin ndër çështjet më të diskutueshme, për të cilat nuk pati zgjidhje. Dita e dytë e bisedimeve përfundoi pas vetëm dy orësh, duke sinjalizuar përparim të pakët dhe duke nënvizuar se sa larg duket ende një marrëveshje, pavarësisht premtimeve të Donald Trump për t’i dhënë fund luftës.
Negociatori kryesor i Rusisë, Vladimir Medinsky, i përshkroi diskutimet në Gjenevë si “të vështira, por të tipit biznes” ndërsa u largua nga bisedimet, duke shtuar se ishin planifikuar raunde të mëtejshme së shpejti.
- Champions League: Gordon ‘poker’ golash, Newcastle ‘luan tenis’ me Qarabag, sheh 1/8 e finaleve në horizont - 18/02/2026
- “Liria ka një emër!”/ Kryeministri Rama ndan fjalën e fundit të Hashim Thaçit para trupës gjykuese në Hagë - 18/02/2026
- “Sulmi i SHBA-ve ndaj Iranit është pranë”, mediat: Presidenti Trump mund të japë urdhrin së shpejti - 18/02/2026