“Europa duhet të marrë menjëherë përgjegjësi të mëdha për mbrojtjen e saj dhe të ndalë varësinë nga Shtetet e Bashkuara”, deklaroi shefja e diplomacisë së BE-së, Kaja Kallas, duke paralajmëruar se marrëdhënia transatlantike është tronditur në themele.
Në një konferencë për mbrojtjen, Kallas theksoi se edhe pse SHBA do të mbetet partnere dhe aleate e Europës, asnjë fuqi e madhe nuk ka mbijetuar ndonjëherë duke “deleguar mbijetesën e vet”. Sipas saj, Europa nuk është më prioritet strategjik për Uashingtonin dhe duhet të ndryshojë qasjen e saj të sigurisë.
Deklaratat vijnë në një klimë tensioni me SHBA-në, pasi presidenti amerikan Donald Trump kërcënoi me marrjen nën kontroll të Groenlandës, territor gjysmë-autonom i Danimarkës, duke shkaktuar reagime të forta në Europë.
Kallas reagoi edhe ndaj deklaratës së sekretarit të përgjithshëm të NATO-s, Mark Rutte, i cili tha se Europa nuk mund të mbrohet pa SHBA-në. Këto komente u kundërshtuan nga disa liderë europianë, përfshirë ministrin e Jashtëm francez Jean-Noël Barrot, i cili theksoi se Europa “mund dhe duhet të marrë kontrollin e sigurisë së saj”.
Shefja e diplomacisë së BE-së nënvizoi se largimi gradual i SHBA-së nga Europa është strukturor dhe jo i përkohshëm, duke shtuar se vendet europiane duhet të veprojnë më shumë si një bllok i bashkuar, veçanërisht 23 shtetet që janë njëkohësisht anëtare të BE-së dhe NATO-s.
Nga ana e tij, Mark Rutte ka paralajmëruar se një mbrojtje plotësisht e pavarur europiane do të kërkonte shpenzime deri në 10% të Prodhimit të Brendshëm Bruto dhe kapacitete bërthamore, ndërsa komisioneri i BE-së për Mbrojtjen, Andrius Kubilius, deklaroi se SHBA pret që Europa të marrë përgjegjësi më të mëdha, pasi prania amerikane në kontinent pritet të ulet.
Debati për sigurinë europiane është intensifikuar pas agresionit rus në Ukrainë dhe zgjerimit të NATO-s me Suedinë dhe Finlandën, ndërsa anëtarësimi i Ukrainës në NATO mbetet i pamundur në afat të shkurtër.
- “Për arsye të shumta…”/ Kroacia refuzon Presidentin Trump, nuk do t’i bashkohet Bordit të Paqes - 28/01/2026
- Tre gjymtyrët kryesore që Kadare i la si pasuri kombit shqiptar - 28/01/2026
- Amerika “rrëmben” deputetët e rinj/ Leka: Berisha e ka ulur figurën e tij. Të rinjtë, të zhveshur nga ‘Berishizmi’ - 28/01/2026