Unike në llojin e saj, ku dikur kryente shërbesat fetare Gjergj Kastrioti së bashku me bashkëshorten e tij Donikën, por sot kisha “Bazilika e Shën Mërisë” në Kurbin është degraduar. Me mure thuajse të rëna dhe afreske të dëmtuara, ky objekt kulti 1500-vjeçar monument kulture, me vlera të veçanta historike, rrezikon të zhbëhet.
Pavarësisht gjendjes së saj, besimtarët që e vizitojnë janë të shumtë.
Shumica e banorëve të zonës janë kryesisht myslimanë, por kjo nuk i pengon që të luten pranë kishës historike. Ata bëjnë thirrje që autoritetet ta shpëtojnë nga shembja e plotë.
Kisha është përfshirë në programin e rindërtimit nga termeti dhe shume shpejt do të nisë ndërhyrja për restaurimin e saj.
Bazilika mesjetare e Shën Mërisë ndodhet në fshatin me të njëjtin emër në Malësinë e Kurbinit. E ndërtuar me një teknikë romake, kisha konsiderohet një ndër objektet më të rralla të kultit në Shqipëri.