KOSOVË- Grupi Parlamentar i Partisë Demokratike të Kosovës (PDK) i ka dërguar sot një kërkesë zyrtare Avni Deharit, në cilësinë e kryesuesit të seancës konstituive sipas moshës, që nesër, më 12 gusht, të thërrasë vazhdimin e seancës konstituive të Kuvendit të Kosovës.
Në letrën e dërguar Deharit, PDK-ja vlerëson se moskonstituimi i Kuvendit brenda afatit të përcaktuar ka krijuar një situatë të rëndë kushtetuese, por thekson se tejkalimi i këtij afati nuk e shuan detyrimin për përfundimin e procesit të konstituimit.
“Obligimi për përfundimin e procesit konstituiv mbetet dhe duhet të përmbushet pa vonesa të mëtejshme”, thuhet në njoftimin e PDK-së.
Partia Demokratike e Kosovës kërkon që seanca të thirret pa vonesa dhe që deputetëve të zgjedhur t’u mundësohet ushtrimi i mandatit të tyre.
PDK-ja ka bërë të ditur se, pavarësisht nëse Dehari e përmbush apo jo këtë kërkesë, deputetët e saj do të jenë nesër, më 12 gusht, në orën 11:00, të pranishëm në sallën e Kuvendit.
Sipas PDK-së, në këtë orë përfundon edhe “48-orëshi i dytë për vazhdimin e seancës”, siç përcaktohet me Rregulloren e Kuvendit.
Në fund, PDK-ja u ka bërë thirrje edhe grupeve të tjera parlamentare dhe deputetëve të zgjedhur që të jenë nesër në sallën e Kuvendit, me qëllim që, sipas saj, të dëshmojnë gatishmërinë politike dhe vullnetin për përmbushjen e besimit të marrë nga qytetarët.
- BISEDE ME NJE MIK TE RRALLE - 11/08/2026
- Në Logun e Bjeshkëve, në tokën e zanave, e Bukura e Dheut, nga qielli zbret, stolisur me hir e veshur me xhubletë - 11/08/2026
- Deklarata e Vuçiç për lumin Ibër, reagojnë dhe SHBA-të: Normalizimi i marrëdhënieve Kosovë-Serbi, pjesë e domosdoshme e stabilitetit! - 11/08/2026