Premton rritje pagash, por dhe masa për të “paudhët” brenda llojit
Kryeministri Edi Rama thotë se ka ardhur koha që të rriten sërish pagat për policinë. Gjatë takimit me drejtorët e policisë, kreu i qeverisë u shpreh se “pagat do i rrisim menjëherë, sidomos për nivelin bazë, por thënë kjo, që në thelb do të thotë se pavarësisht cfarë thuhet, e gjithmonë do thuhet për fat të keq, nuk ka pasur kurrë në historinë e policisë një raport si ky që ne kemi vendosur me policinë e shtetit”.
Kryeministri Rama u shpreh se në heshtje ka mbështetur protestën para ministrisë se Brendshme për vogëlushen që u vra nga polici në plazhin e Potamit.
Më tej Rama u shpreh se kohët e fundit kanë marrë hov të paudhët në policinë e shtetit, por theksoi se duhen ndaluar me disiplinë ushtarake.
“Ishte vërtet një neveri e gjallë sesi më të pangushëllueshmit u shfaqen ulëritësit profesionistë, në politikë dhe media, a thua se vogëlushja iku nga kjo botë për të furnizuar me gjakun e saj engjëllor makinerinë djallëzore të urrejtjes që nuk rresht, janë po ata. Madje jo vetëm që nuk dua të merrem me ata, por arsye që i sjell këtu është se dua ta them publikisht me keqardhje që bëra gabim që u mora menjëherë pas ngjarjes dhe u keqkuptova se e kishin të gjithë me ata që ishin të revoltuar, sic isha dhe unë vetë. Në fakt nuk ishte kështu. Jo vetëm i kam mirëkuptuar, por me veten time në heshtje i kam përgëzuar për të dalë në atë protestë paqësore këtu para ministrisë së brendshme, pavarësisht se ai soji e shkatërroi edhe atë protestë. Nuk isha me atë që vogëlushen e vrau shteti, por ndaj dhimbjen me ata.
Dua të ngre një pyetje, pasi e kam pyetur veten shumë shpesh. A ishte ai individ i paudhë me skafin e tij vrastar shëmbëlltyra e sotme e policisë së shtetit? Sepse nga kjo pyetje përgjigja e saj vazhdon në dy rrugë të ndryshme dhe jo paralele arsyetimi. Unë them jo, as ai që uroj të marrë ndëshkimin më ekstrem dhe as të tjerë individë, të cilët vetë agjencia e mbikëqyrjes policore i ndjek dhe i heton, i ndalon brenda uniformave blu nuk kanë shëmbëlltyrën e policisë, ata janë jashtëmbetje të një organizmi që është në transformim, ku të paudhët nuk mungojnë, por luftohet dhe luftohen më shumë se asnjëherë më parë. Edhe pse le ta themi që në muajt e fundit kanë marrë një hov të paudhët brenda llojit në policinë e shtetit, një hov që duhet ndërprerë me disipline ushtarake.
Falë angazhimit të trupës dhe drejtimit profesional dhe të vendosur të agjencisë së mbikëqyrjes policore nga drejtori i ri i policies, nga janari në qershor të këtij viti janë dënuar me burg me vendim gjykatë 29 punonjës, me arrest shtëpie 31 dhe 31 të tjerë me masë disiplinorë. 12 janë ish shefa komisariatesh dhe një drejtor. Pra prerja e druve të shtrembër në rreshtat e gjatë të policisë është pjesë e pandashme e rritjes së fuqizimit të saj”, tha Rama.
- Silvinjo pas suksesit ndaj Ukrainës: Ke pak mundësi të përmbysësh ndeshje në këto nivele. E merituam, fitore kyç për ecurinë në turne. - 07/09/2024
- Festë kuqezi në Pragë, Shqipëria nis me fitore Ligën e Kombeve, mposht për herë të parë Ukrainën - 07/09/2024
- Skandali i Ministrit të Kulturës që tronditi qeverinë e Melonit/ Reagimi i të dashurës sekrete dhe krahasimi me Berlusconin, ç’po ndodh në Itali - 07/09/2024