Nga Kreshnik Spahiu
Kur shqiptarët rrëzuan bustin e Enver Hoxhës dhe e zvarritën nëpër Tiranë deri tek godina ku unë me shokët e mi ishim ngujuar në grevë urie, mendova që asnjë politikan shqiptar nuk do e kishte fundin aq të keq, por isha gabuar.
Enver Hoxha sa jetoi, mbretëroi dhe nuk e përjetoi zvarritjen nëpër rrugë.
Sali Berisha po përjeton poshtërim për së gjalli.
Populli shqiptar dje nuk votoi nga jugu në veri për të bërë mbret Edi Ramën por për të shporrur Sali Berishën nga politika.
Njeriu që krijoi grupimin e strukturuar anti-amerkan në Shqipëri dje mori shuplakën e popullit më pro amerikan në Europë.
48 orë para zgjedhjeve, arrestimi i kandidatit grek që ai kishte vendosur në Himarë i rrëzoi të gjithë kauzën e tij sovraniste.
– Berisha kundër Amerikës hiqej si sovran, por para Greqisë hoqi brekët.
– Kur ndërhyn qeveria amerikane thotë: armiqësore. Kur ndërhyn qeveria greke thotë: miqësore. Ambasadoren amerikane e quan lavire.
– Ambasadorin grek e quan partner demokracie, por Ambasadorin anglez e fyen diplomat orgjie, Belerin e Greqisë e bën kryetar Bashkie.
– Thotë: shpëtova Kosovën nga ndarja me Serbinë, por ndan detin dhe Himarën me Greqinë.
Vota plebishitare dje në gjithë Shqipërinë nga Tropoja dhe Shkodra deri tek Korça dhe Himara, e ndëshkuan si Avni Rustemi tradhëtinë e Toptanit.
Sot Berisha do dalë dhe do deklarojë që zgjedhjet u manipuluan ndonëse ende në SPAK nuk ka asnjë kallzim penal.
Sali Berisha sot do dalë dhe do deklarohej që beteja jonë kundër SHBA sapo ka filluar por ai është pushkatuar nga populli pro amerikan.
Sali Berisha do dalë sot dhe do deklarojë që humbjen na e shkaktoi Taulanti dhe Lulzimi por shqiptarët e fundosën edhe në qytetet ku s’kishte kandidat Partia Demokratike e vulës.
Sali Berisha do dalë sot dhe do thotë Sorosi bleu votat në gjithë Shqipërinë, por do bëhet qesharak kur ta dëgjojnë në Tropojë, Shkodër, Kamëz, Bathore apo Himarë të gjithë ata që e mbështetën nē çdo protestë por që ky i braktisi dhe përdori në hallin e tij personal me Amerikēn.
Sali Berisha do dalë sot dhe do deklarojë që ishte puç global dhe do vazhdojë betejën me Amerikën, Anglinë, BE dhe gjithë planetin por s’i ka mbetur askush. Madje as autobusi falas i Belindit nuk e mbush dot dhe do i mjaftonte një furgon me njerëz sepse as familja e tij nuk do e ndjekë pas në çmendurinë e tij.
Sali Berisha do dalë do thotë që Rama nuk rrëzohet me vota por me Revolucion dhe kjo është shumë e vërtetë, por revolucioni opozitar duhet të fillojë nga nesër në dyert e SHQUP, të cilat ai i ka pushtuar. Opozita shqiptare duhet organizuar për ta tërhequar zvarrë nga zyra ashtu si bustin e Enver Hoxhës si njeriu që po mban peng opozitën dhe po mban Ramën në pushtet.
Prandaj largimi i Berishës si kryetar opozite është mision patriotik dhe kombëtar: Berisha ik!
- Nga Moglica tek linja me Kosovën, tre projektet energjetike që Shqipëria çon tek BE-ja për financim - 17/03/2026
- “Jemi të gatshëm për bashkëpunim me Trump”, Macron ndryshon qëndrimin për Ngushticën e Hormuzit - 17/03/2026
- Raporti Rama-Meloni, politikani italian: Është një raport motër-vëlla, mes Italisë dhe Shqipërisë - 17/03/2026