Së fundmi, një postim i i mikut të tij Shkëlqim Hajdari nga tempulli botëror i basketbollit, Madison Square Garden, solli një emocion të veçantë për sportdashësit shqiptarë. Në atë video, ku shfaqen fotot e legjendarit Agim Fagu, metafora “Agim Fagu ka zbritur në Madison Square Garden” tingëllon si një përulje simbolike për legjendën e sportit, një figurë që nuk i përket vetëm së shkuarës, por një trashëgimie të gjallë. Sepse sa herë përmendet emri i tij, flitet për epokën që mban emrin e tij – një kohë kur basketbolli shqiptar kishte fytyrë, karakter dhe madhështi.
Agim Fagu është një nga figurat më të mëdha të basketbollit shqiptar, një emër që lidhet ngushtë me historinë, dinjitetin dhe pasionin për këtë sport. I lindur në vitin 1942, Fagu u formua si sportist në vitet kur basketbolli shqiptar po kërkonte identitetin e vet dhe shumë shpejt u shndërrua në një nga lojtarët më dominues të kohës. Ai ishte gjithnjë pjesë e klubit Partizani dhe për shumë vite ishte shtyllë e padiskutueshme e Kombëtares së Shqipërisë. Me teknikë të rafinuar, intuitë loje dhe lidership natyral, ai nuk ishte thjesht një basketbollist i madh – ai u kthye në simbol brezi, në standard profesionalizmi dhe karakteri sportiv. Në 4 Kampionate Evropiane me Shqipërinë, ka dalë koshashënuesi më i mirë. Fagu është thirrur 2 herë me Kombëtaren e Evropës, por që për arësye të kuptueshme nuk ka marrë pjesë.
Në vitet ’70 shtypi evropian e konsideronte Agim Fagun në nivelin e basketbollistëve më të mirë të Evropës (Jugosllavë, Gjermanë, Grekë etj) dhe e krahasonin me Xhabarin, ish-ylli amerikan i NBA.
Padiskutim, Agim Fagu është sportisti më i mirë i të gjitha kohërave të Shqipërisë deri më sot.
Pas përfundimit të karrierës si lojtar, ai vazhdoi të kontribuojë në basketboll edhe si trajner dhe pedagog, duke formuar breza të rinj lojtarësh dhe duke lënë gjurmë të thella në edukimin sportiv shqiptar. Emri i tij sot përmendet me respekt të veçantë, sepse përfaqëson një epokë ku sporti ndërtohej me sakrificë, disiplinë dhe dashuri të pastër për lojën. Dhe pikërisht për këtë arsye, çdo imazh, çdo kujtim dhe çdo simbol që e lidh figurën e tij me skena të mëdha të basketbollit botëror, e forcon edhe më shumë vendin që Agim Fagu zë në historinë e sportit shqiptar: një Legjendë!
