Ish-prokurori i njohur Shkëlqim Hajdari ka komentuar ngjarjen e shëmtuar të ndodhur ndaj Top Channel. Duke folur për krimin që i mori jetën rojës Pal Kola, Hajdari shprehet për JavaNews se sulmi nuk është aspak i sofistikuar pasi autorët kanë bërë disa gabime. Sipas tij, pikërisht këto gabime do të çojnë edhe në identifikimin e tyre.
“Nuk do ta besoja as në ëndërr një ngjarje të tillë në vitin 2023 ndaj medias. Por kjo tashmë ka ndodhur ndaj uroj e shpresoj që sa më shpejt autorët të zbulohen e të dalin para drejtësisë. Duke e parë ngjarjen nga jashtë, mënyra se si është kryer, vendi, koha, mjetet e përdorura duket në pamje të parë si e sofistikuar. Por autorët kanë bërë edhe veprime të gabuara, të cilat do t’i shfrytezojnë ato që po merren me hetime” – tha ish-prokurori.
Hajdari solli në vëmendje edhe djegien e gazetës ‘Koha Jonë’, si një nga sulmet më të shëmtuara, por edhe më brutale ndaj mediave në vend.
“Kjo çështje është hetuar pothuajse nga e para, pasi veprimet e kryera në marsin e 1997 ishin të pakta. Pra kishim një kqyerje të dobët të vendit të ngjarjes, disa foto, pyetje të shumë pak dëshmitarëve që në të shumtën e rasteve ishin siperfaqesore. U vu në lëvizje nga i dëmtuari kryesor nga kjo ngjarje Z. Nikoll Lesi, ish-pronar i Koha Jonë. U administruan nga ana jonë prova të vjetra dhe të reja, shkresa, filmime, regjistrime, dëshmitarë përfshirë dhe gazetarë. U kryen ballafaqime etj. Bazuar në prova u arrit në përfundimin se individë dhe segmente të organeve shtetërore ishin të përfshirë në këtë ngjarje kriminale” – tha Shkëlqim Hajdari për JavaNews.
