Gjatë vitit 2023 bashkia e Maliqit do të përfundojë të gjitha punimet e filluara në infrastrukturën rrugore gjatë vitit të kaluar.
Nga ana tjetër sipas kryetarit të bashkisë Gëzim Topçiu, gjatë këtij viti do të kryhen punime të tjera për rikonstruksionin e rrugëve në njësitë administrative, ku në total janë parashikuar ndërhyrje në 10 rrugë fshatrash.
Vlera e investimit të pritshëm kap shumën e 60 milion lekëve, nga të ardhurat e vetë bashkisë. Gjithnjë sipas kryebashkiakut Topçiu tashmë është kryer faza e tenderimit për investimet që do të realizohen dhe shumë shpejt pritet të fillojnë punimet.
Gjatë vitit 2023 investime do të ketë edhe në rrjetin e kanalizimeve të ujërave të zeza dhe në ujësjellësat e fshatrave.
Gjithashtu gjatë vitit 2023 nga ana e bashkisë do të ndërhyet edhe në tre prej institucioneve të arsimit parauniversitar, kryesisht në sistemin e ngrohjes dhe rehabilitimin e këtyre godinave.
Gjatë vitit 2022 bashkia Maliq përmes projektit të përmirësimit të infrastrukturës rrugore në fshatra, bëri të mundur rikonstruksionin e 10 rrugëve në disa njësi administrative, ndërkohë që po kaq do të rehabitohen edhe gjatë këtij vitit.
