Hapet segmenti rrugor Panarit-Treskë/ Një mundësi alternative për nevojat e banorëve të kësaj zone

Lehtësohet lëvizja për banorët e zonës së Panaritit. Bashkia Korçë, me mbështetjen e Ministrisë së Mbrojtjes ka filluar punën për hapjen e segmentit rrugor Panarit-Treskë në njësinë administrative Vithkuq, si një mundësi alternative për nevojat e banorëve të kësaj zone.

Ndërhyrja po bëhet me qëllim minimizimin e problematikave që ka gjatë periudhës së dimrit rruga që të çon në fshatin Panarit. Për shkak të terrenit dhe kushteve atmosferike gjatë dimrit, fshati izolohet për më shumë se 5 muaj, pasi trashësia e borës në majën e Mashkullorës, për shkak të erërave të forta, shkon më shumë se 3 metra, duke e bërë të pamundur mbajtjen hapur të aksit rrugor Shtyllë-Panarit.

Në kushte të një dimri që zgjat banorët mundohen të sigurojnë zahiretë për veten e tyre dhe bazën ushqimore për blegtorinë. Ata tregojnë për vështirësitë e përballimit të stinës së gjatë të dimrit, për të siguruar jetesën e tyre në të tilla kushte.

Spartak Laze, banor i kësaj zone njëherazi edhe drejtor i shkollës së fshatit thotë se sigurimi i një rruge alternative do të lehtësojë lëvizjen banorëve nga Panariti në drejtim të Treskës e më pas drejt Korçës.

Burime pranë bashkisë Korçë bëjnë me dije se aktualisht po punohet me vendosjen e tombinove dhe çakullimin e rrugës.