Dhomat e Specializuara të Kosovës në Hagë shpallin sot (16 shtator) aktgjykimin e shkallës së parë për ish-krerët e UÇK, Hashim Thaçi, Kadri Veseli, Rexhep Selimi dhe Jakup Krasniqi, në procesin gjyqësor për akuzat për krime lufte dhe krime kundër njerëzimit.
Seanca për shpalljen e vendimit nisi në orën 10:00 dhe vendimi do të bëhet i ditur veçmas për secilin prej katër të akuzuarve. Të gjithë i kanë mohuar akuzat.
Sheshi i Prishtinës është mbushur plotë me mbështetës e simbole kombëtare, teksa kërkohet lirimi. Edhe në Hagë janë mbledhur mijëra shqiptarë para Gjykatës.
Procesi gjyqësor në Hagë ka zgjatur më shumë se katër vite dhe ka përfshirë dëshmitë e mbi 100 personave nga ana e Prokurorisë, ndërsa mbrojtja ka paraqitur dëshmitarë dhe argumente në kundërshtim me akuzat dhe pretendimet për përgjegjësinë e të pandehurve.
Prokuroria ka kërkuar dënime me burgim për katër ish-krerët e UÇK-së, ndërsa mbrojtja ka kërkuar rrëzimin e akuzave.
Në Kosovë, shpallja e aktgjykimit është pritur me aktivitete publike në mbështetje të të akuzuarve, përfshirë “Marshin për Liri” në Prishtinë. Edhe në Hagë janë mbledhur mbështetës, ndërsa autoritetet holandeze kanë shtuar masat e sigurisë pranë objektit të Dhomave të Specializuara.
Aktgjykimi i shkallës së parë nuk e mbyll domosdoshmërisht procesin. Prokuroria dhe mbrojtja kanë të drejtë të apelojnë vendimin, sipas procedurave të Dhomave të Specializuara të Kosovës.
- Në pritje të verdiktit nga Haga, vëllezërit e Thaçit dhe Krasniqit: Besojmë në luftën e pastër të UÇK-së dhe drejtësi, s’ka arsye për dënim - 16/09/2026
- “Jam krenar për secilin prej tyre”- Djali i Krasniqit flet nga Haga: Presim që sot të katërt të lirohen nga akuzat! - 16/09/2026
- Kush janë 4 gjyqtarët që do të shpallin sot vendimin për ish-krerët e UÇK-së në Hagë - 16/09/2026