Shtetet e Bashkuara do të rifillojnë testet e armëve bërthamore, vetëm nëse presidenti Donald Trump është shprehur gabimisht.
Zëvendëspresidenti Vance e konfirmoi vendimin, duke thënë se “shpërthimet janë të nevojshme për t’u siguruar që arsenali amerikan funksionon siç duhet”.
Ekspertët e fushës megjithatë kujtojnë se testet e fundit bërthamore janë zhvilluar në vitin 1992 dhe nuk janë më të domosdoshme, përveçse në rastin, kur duhen ndërtuar armë të reja.
Dyshimet rreth deklaratës së Trump lindin për disa arsye: testet bërthamore janë në kompetencë të Departamentit të Energjisë, jo të Pentagonit; një veprim i tillë nuk do t’i shërbente interesave strategjike të SHBA-së; dhe mund të jetë një reagim ndaj lëvizjeve të fundit të Putinit, që lidhen me sisteme me shtytje bërthamore, jo me shpërthime.
Një mundësi më shqetësuese është që Trump beson se ndodhet në prag të një lufte bërthamore dhe po lëshon këto kërcënime, për ta parandaluar më të keqen.
Në një postim në rrjetin e tij social, pak para takimit me presidentin kinez Xi në Korenë e Jugut, Trump shkroi se SHBA-të zotërojnë më shumë armë bërthamore se çdo vend tjetër.
“SHBA-të zotërojnë më shumë armë bërthamore se çdo vend tjetër. Modernizimi dhe rinovimi i plotë u arrit gjatë mandatit tim të parë. Për shkak të fuqisë së tyre shkatërrimtare, e urreja ta bëja, por nuk kisha zgjedhje! Rusia është e dyta dhe Kina e treta, por do të na arrijë brenda pesë vitesh. Për shkak të testeve të vendeve të tjera, kam urdhëruar Departamentin e Luftës të nisë testimet tona bërthamore në bazë të barazisë. Procesi fillon menjëherë”, tha Trump.
Në fakt, Rusia ka më shumë koka bërthamore se SHBA-të, edhe pse ndoshta më pak efikase. Testet nuk kryhen nga Pentagoni, por nga Departamenti i Energjisë, dhe vendi i vetëm i autorizuar në territorin amerikan është Nevada, ku autoritetet lokale i kanë ndaluar këto shpërthime. Testi i fundit bërthamor në botë është kryer nga Koreja e Veriut në vitin 2017.
Nga Air Force One, Trump sqaroi se deklarata nuk ishte drejtuar ndaj Xi-së dhe se ai në fakt dëshiron çarmatimin bërthamor. Ai shtoi se po diskuton këtë çështje me Moskën dhe se shpreson të rifillojë negociatat me Kinën.
Megjithë konfuzionet, analistët mendojnë se Trump donte të dërgonte një sinjal politik. Ai donte të dërgonte një paralajmërim ndaj Putinit që të ndalojë testet dhe të negociojë paqen në Ukrainë, ndaj Xi-së për të frenuar garën e armatimeve, dhe ndaj vendeve si Irani apo Koreja e Veriut, që të mos ndjekin rrugën bërthamore. /La Repubblica/
- Grabitja e shekullit i Louvre| Si një ekuacion 50-vjeçar mund të shpëtojë artin botëror - 31/10/2025
- Ajo doli e dyta në provimin më të rëndësishëm të filozofisë në Francë, dhe burri që e mundi, i kërkoi ta kalonte gjithë jetën me të - 31/10/2025
- Veliaj lë paraburgimin nën masa të rrepta sigurie/ Do marrë pjesë në seancën në ‘GJK’ - 31/10/2025