Faza e grupeve e Botërorit 2026 u mbyll dhe tashmë numrat flasin vetë.
Përditësimi i fundit i algoritmeve të Courtside ka sjellë lëvizje dramatike në bursën e favoritëve. Nëse disa kombëtare kanë treguar stabilitet të plotë, të tjera kanë pësuar rënie të lira që askush nuk i parashikonte. Ja si paraqitet situata sipas shifrave të fundit:
Dueli i Titanëve: Spanja dikton ritmin, Franca në “pasqyrë”
Spanja (18.7%) mbetet makineria më konstante e këtij kompeticioni. E nisi si favorite dhe nuk e lëshoi timonin për asnjë moment. Grafiku i tyre është pothuajse një vijë e drejtë horizontale, pa luhatje dhe pa panik. Edhe kur të tjerët iu afruan, “Furia e Kuqe” tregoi se është skuadra më solide. Nga ana tjetër, Franca (16.8%) është fituesja e madhe e fazës së grupeve. Nëse Spanja ka qëndrueshmërinë, Franca ka hovin. “Gjelat” kanë bërë përmirësimin më të madh mes pretendentëve kryesorë (+3 pozicione) duke rikuperuar terren hap pas hapi, aq sa sot janë vetëm një frymë larg kreut.
Stabiliteti anglez dhe rënia e Portugalisë
Anglia (10.5%) ka treguar një ecuri tepër të qëndrueshme. Të pozicionuar gjithmonë në tre vendet e para dhe pa luhatje të mëdha, “Tre Luanët” mbeten një kërcënim i heshtur por shumë serioz. Ndërkohë, Portugalia (10.5%), e cila ishte fillimisht në podium, ka ndier peshën e fazës së grupeve. Skuadra luzitane ka humbur terren dhe aktualisht ndan të njëjtat kuota me Anglinë, duke zbritur në vendin e katërt.
Ethet e Amerikës Latine: Argjentina parakalon Brazilin
Argjentina (6.5%) dhuroi një rikthim tipik kampionësh. Pasi pësuan një rënie shqetësuese në mesin e fazës së grupeve, “Albiceleste” gjeti forcën të ringrihej fuqishëm. Ata jo vetëm që rikuperuan pozicione, por arritën të parakalojnë rivalët e tyre të përjetshëm. Brazili (6.0%), nga ana tjetër, është në rënie. “Seleção” e nisi me shkëlqim, por një rënie e dukshme në lojë dhe në përqindje i zbriti ata në vendin e gjashtë.
Ndjekësit e tjerë: Gjermania dhe Holanda
Gjermania (5.3%) ka shënuar një rikuperim të lehtë pas disa ditësh në rënie, duke u ngjitur në vendin e shtatë pas rezultateve të fundit. Holanda (4.4%) mbetet skuadra me grafikun më të rregullt e “monoton” të turneut, duke lëvizur shumë pak dhe duke qëndruar vazhdimisht pranë vendeve të shtata dhe të teta.
Surpriza e çmendur dhe zhgënjimi i madh
Në këtë kampionat, Australia ka bërë surprizën më të bukur pozitive duke u ngjitur me plot 13 vende. Falë një fitoreje 2-0 ndaj Turqisë dhe barazimit me Paraguain, ata bënë kërcimin më të madh statistikor. Krejt e kundërta ndodhi me Uruguain, që shënoi dështimin më të madh. Barazimet me Arabinë Saudite e Kepin e Gjelbër, si dhe humbja ndaj Spanjës, i shkaktuan një rënie prej 15 pozicionesh, duke i nxjerrë praktikisht nga lista e pretendentëve seriozë për titullin.
- Sulmuesi në dyshim për sfidën ndaj Suedisë, Franca pa një prej “snajperëve” në ndeshjen vendimtare - 29/06/2026
- Analiza/ Albatros Rexhaj: Këta nuk duan reformë, këta duan pushtet - 29/06/2026
- Nga 1 korriku rreth 900 pensionistë përfitojnë nga indeksimi i ri, Koçiu: Pensionet janë rritur mbi 70% që nga viti 2013 - 29/06/2026