Ish-Ministri për Europën dhe Punët e Jashtme, Ditmir Bushati ka publikuar podcast-in e radhës në të cilin analizon efektet e luftës që vijon prej 9 muajsh, që nga pushtimi i Ukrainës nga Rusia.
Në këtë podcast ai flet për realitetin e ri gjeopolitik për peizazhin e ndryshuar të sigurisë dhe pasojat e kësaj lufte për rajonin tonë.
Sipas Bushatit, rendi ndërkombëtar është sfiduar ndërkohë që, “Ukrainasit po tregojnë se është e mundur të jesh patriot dhe të besosh në një shoqëri të hapur e demokratike”.
Kjo luftë, thotë ai, ka prodhuar edhe një realitet të ri gjeopolitik, “Rusia është pothuajse e izoluar diplomatikisht, kulturalisht dhe ekonomikisht nga bota e zhvilluar. Kjo është hera e parë që i ndodh një ekonomie të pasluftës, pjesë e G-20”.
Sipas Bushatit, në raport me NATO-n, Rusia ndjehet e befasuar, pasi prej kohësh përpiqej t’i vendoste shtetet e Aleancës kundër njeri-tjetrit duke rrëmuar në diferencat mes tyre. Në të njëjtën kohë, edhe BE-ja i dha fund një strategjie të zbatuar që nga përfundimi i Luftës së Ftohtë, sipas të cilës “paqja mund të vij përmes ekonomisë, dhe veçanërisht përmes tregtisë së energjisë”.
Duke analizuar luftën dhe efektin e saj në rajonin tonë, Bushati thotë se “Lufta në Ukrainë ka pasoja të rëndësishme që mund të ndikojnë në perspektivën europiane të Ballkanit Perëndimor”.