Një nga ditët më të trazuara të viteve të fundit të Departamentit Amerikan të Shtetit u shënua të shtunën, me largimin nga detyra të mbi 1300 punonjësve si pjesë e një riorganizimi të thellë të institucionit.
Vendimi i firmosur nga Sekretari i Shtetit Marco Rubio, shkaktoi jo pak reagime në radhët e shërbimit diplomatik amerikan.
Skena të pazakonta u panë jashtë godinës së DASH-it, ku qindra punonjës, të shoqëruar nga kolegë dhe mbështetës, u larguan me sendet personale në duar dhe emocione të dukshme në fytyrë. Mes protestuesve ka qenë edhe ish-ambasadorja e SHBA-së në Shqipëri, Yuri Kim, e cila ka mbajtur disa detyra në diplomacinë amerikane gjatë viteve të fundit.
Nga një hulumtim i Top Channel, rezulton se Kim vazhdon punën si Këshilltare e Lartë për Efikasitet dhe Llogaridhënie për Byronë e Çështjeve Evropiane dhe Euroaziatike, por ka marrë pjesë në protestën simbolike në shenjë solidariteti për kolegët e shkarkuar.
Pamjet e shpërndara në media tregojnë ish-ambasadoren duke përqafuar dhe ngushëlluar ish-kolegët e saj, ndërsa mësohet të jetë shprehur se kjo “Është një ditë e dhimbshme për Shërbimin e Jashtëm. Ky vendim është një goditje për shumë prej atyre që kanë dhënë një kontribut prej vitesh.”
Atmosfera jashtë ndërtesës ishte e mbushur me emocione. Pankarta me mbishkrime si “Jo spastrim politik” dhe “Ruani profesionalizmin në diplomaci” u panë në duart e protestuesve, të cilët e konsideruan vendimin si të motivuar politikisht.
Ky veprim i administratës ka ngjallur reagime të shumta nga zyrtarë aktualë dhe ish-zyrtarë të lartë të diplomacisë amerikane. Disa e shohin këtë si një përpjekje për të forcuar kontrollin politik mbi institucionin, ndërsa të tjerë si një nismë të nevojshme për të rritur rendimentin në një departament që shpesh ka qenë në qendër të kritikave.
- “Toka e klubit Partizani u ble nga italianët”, dhëndri i Berishës padit Moisiun për shpifje - 14/07/2025
- “Turp që manipuloi fjalët e Trumpit”, Osmani i përgjigjet Richard Grenellit - 14/07/2025
- Zjarr i madh në qendrën e kujdesit ndaj të moshuarve në Massachusetts, shumë viktima dhe të plagosur - 14/07/2025