78 vite më parë qyteti i Korçës ngriti flamurin e lirisë ndaj në këtë 24 Tetor, banorë, familjarë të dëshmorëve dhe veteranë si edhe përfaqësues të pushtetit vendor kanë zhvilluar një ceremoni solemne në shenjë nderimi e respekti. Aktiviteti ka filluar me interpretimin e bandës së qytetit tek sheshi përpara teatrit.
Në fjalën e tij përshëndetëse në ceremoninë përkujtimore organizuar në këtë 78-vjetor të ditës së çlirimit të Korçës, kryetari i Komitetit të Veteranëve të LANÇ-it Tomor Asabella, ka risjellë në vemendje ngjarjet e asaj dite.
Ceremonia është përshëndetur edhe nga përfaqësues të pushtetit vendor, të cilët kanë shprehur mirënjohje dhe respekt për dëshmorët që i sollën Korçës lirinë.
I pranishëm në këtë ceremoni ka qënë edhe Kryetar i Organizatës Kombëtare të Familjes së Dëshmorëve të LANÇ dhe Dëshmorëve të Tjerë të Atdheut, Gjergji Velo i cili ka dhënë tituj nderi për disa dëshmorë që i sollën lirinë qytetit.
Ceremonia përkujtimore në kuadër të 78-vjetorit të Çlirimit të Korçës, ka vijuar me një koncert festiv, duke i dhënë ngjyrat patriotike kësaj dite, si një nga më të rëndësishmet në memorien historike të banorëve të Korçës.
